वासिङ्टन डीसी । अमेरिका र चीनका शीर्ष आर्थिक अधिकारीहरू पेरिसमा भेट्न लागेका छन् । आगामी महिनाको अन्त्यमा अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबिच हुने समिटको लागि मार्ग प्रशस्त गर्न यो भेट हुन लागेको हो ।

वार्ताको नेतृत्व अमेरिकी पक्षबाट ट्रेजरी सेक्रेटरी स्कट बिस्सेन्ट र व्यापार प्रतिनिधि जेमिसन ग्रियरले गर्नेछन् भने चिनियाँ पक्षबाट भाइस प्रिमियर हे लिफेङ सहभागी रहने बताइएको छ ।

वार्तामा अमेरिकी ट्यारिफ नीति, उच्च प्रविधि निर्यात नियन्त्रण, चीनबाट आयात हुने रयर अर्थ मिनरल्स र म्याग्नेट्सको आपूर्ति र अमेरिकी कृषि उत्पादन खरिद जस्ता विषयमा छलफल हुने अपेक्षा गरिएको छ । बैठक पेरिसस्थित आर्थिक सहकार्य र विकास सङ्गठन (ओईसीडी) को मुख्यालयमा हुनेछ । विश्लेषकहरूका अनुसार समयको कमी र अमेरिकी ध्यान हाल मध्यपूर्वको युद्धमा केन्द्रित भएको कारण ठुलो व्यापार समझदारीको सम्भावना कम छ ।

यसवर्ष ट्रम्प र सीबिच तीन अन्य भेटघाटहरू पनि हुन सक्ने सम्भावना छ । जसमा नोभेम्बरमा चीनमा हुने एपेक र डिसेम्बरमा अमेरिकामा हुने जी ट्वेन्टी समिट समावेश छन् । यसले दुई अर्थतन्त्रबिच थप ठोस समझदारीको सम्भावना सिर्जना गर्न सक्छ ।