तेल अभिभ । लेबनानको राजधानी बेरुतमा रहेको हिजबुल्लाहको कमान्ड केन्द्र ध्वस्त पारेको इजरायली सेनाले दाबी गरेको छ । शनिबार हिजबुल्लाहको एलिट रदवान फोर्सको कमान्ड केन्द्र ध्वस्त पारेको बताइएको हो ।

इजरायली रक्षा बल (आईडीएफ) ले जारी गरेको वक्तव्यमा बेरुतस्थित हिज्बुल्लाहका संरचनामा लक्षित आक्रमण गरिएको उल्लेख गरिएको छ । सेनाले दक्षिणी लेबनानको अल–कत्रानी क्षेत्रमा रहेका हिज्बुल्लाहका विभिन्न रकेट प्रक्षेपण स्थलहरूमा पनि हमला गरिएको जनाएको छ ।

इजरायलका अनुसार ती स्थानहरूबाट इजरायलतर्फ आक्रमणको तयारी भइरहेकाले कारबाही गरिएको हो । यसैबिच, अमेरिका–इजरायलले फेब्रुअरी २८ मा इरानमाथि आक्रमण सुरु गरेयता लेबनानमा इजरायली आक्रमणका कारण कम्तीमा ८२६ जनाको मृत्यु भइसकेको बताइएको छ ।