तेहरान । इरानमा एक महिनादेखि जारी युद्ध रोक्न अमेरिकाद्वारा प्रस्तुत प्रस्तावलाई इरानले कडा शब्दमा अस्वीकार गर्दै त्यसलाई अतिशय, अवास्तविक र असम्भव मागहरू समेटिएको बताएको छ । इरानका विदेश मन्त्री इस्माइल बकायीले सोमबार पत्रकार सम्मेलनमा यस्तो प्रतिक्रिया दिएका हुन् ।

उनका अनुसार द्वन्द्व अन्त्य गर्न अमेरिकाले दिएको १५ बुँदे प्रस्तावमा अधिकांश माग अव्यवहारिक र स्वीकार गर्न नसकिने खालका छन् । अमेरिकी राष्ट्रपति डोनाल्ड ट्रम्पको दाबीसँग इरानको यो प्रतिक्रिया सिधै बाझिन्छ ।

हालसम्म इरान र अमेरिकाबिच कुनै प्रत्यक्ष वार्ता नभएको पनि बकायीले स्पष्ट पारेका छन् । ‘अहिलेसम्म हामीले अमेरिकासँग प्रत्यक्ष वार्ता गरेका छैनौँ,’ उनले भने । उनका अनुसार वासिङ्टनबाट आएका सन्देशहरू तेस्रो पक्षमार्फत मात्रै आदान प्रदान भएका छन् ।

यसैबिच पाकिस्तानले आयोजना गरेको भनिएको क्षेत्रीय बैठकमा पनि इरान सहभागी नभएको उनले जानकारी दिए । उनका अनुसार त्यस्ता बैठकहरू पाकिस्तानले आफ्नै ढाँचामा आयोजना गरेको हो । यसमा इरानले सहमति नजनाएको उनले बताए ।

पछिल्लो समय पाकिस्तानले अमेरिका र इरानबिच वार्ता गराउन पहल गर्दै आएको छ । इस्लामाबादमा भएको चार देशीय बैठकपछि पाकिस्तानले निकट भविष्यमा सम्भावित शान्ति वार्ता आयोजना गर्न तयार रहेको भनेको थियो । तर इरानबाट आएको पछिल्लो प्रतिक्रिया हेर्दा हालसम्म औपचारिक वार्ता प्रक्रिया अघि नबढेको स्पष्ट भएको छ ।

साथै अमेरिकी प्रस्तावप्रति उसको गम्भीर असहमति पनि कायमै रहेको देखिन्छ । यसले द्वन्द्व समाधानको प्रयास अझै जटिल बन्ने सङ्केत गरेको छ ।