विराटनगर । नेकपा एमाले संसदीय दलको उपनेतामा रामबहादुर राना मगर मनोनीत भएका छन् । नेकपा एमाले संसदीय दलका नेतासमेत रहेका कोशी प्रदेशका मुख्यमन्त्री हिक्मतकुमार कार्कीले उनलाई उपनेतामा मनोनीत गरेका हुन् ।

यस्तै, सचेतकमा सृजना राई मनोनीत भएकी छिन् । उनीहरू दुवै जनालाई मुख्यमन्त्री कार्कीले बुधवार मनोनीत गरेका हुन् । राना मगर इलाम क्षेत्र नम्बर २ (ख)बाट निर्वाचित भएका हुन् भने राई समानुपातिकबाट सांसद बनेकी हुन् । प्रदेश कमिटी सदस्यसमेत रहेकी उनी भोजपुरकी हुन् ।

गत फागुन १७ गते प्रदेशको नामकरण हुँदा राना मगर कोशी प्रदेशको प्रस्तावक थिए । त्यसपछि भएको पहिचानवादीहरूको आन्दोलनका कारण उनी आफ्नो निर्वाचन क्षेत्रमा जान सकेका छैनन् ।

नेकपा एमाले केन्द्रीय सदस्यसमेत रहेका रानाले प्रदेश नामकरणको विषयमा मुख्यमन्त्री नै दोषी भएको अभिव्यक्ति दिन थालेपछि मुख्यमन्त्री कार्कीले उनलाई उपनेताको जिम्मेवारी दिएका हुन् ।

प्रमुख सचेतकमा भने रेवतीरमण भण्डारी यस अघि नै नियुक्त भइसकेका छन् ।