काठमाडौं। शेयर बजार लगातार ओरालो लागेको छ। बुधबार पनि नेप्से सूचकांक १५.६४ अंकले घटेर २७२६.३३ मा झरेको छ। यसअघि मंगलबार सूचकांक १९ अंकले तल झरेको थियो।

आज म्युचुअल फन्ड र व्यापार समूहबाहेक अरू सबै उपसमूह राताम्मे बनेका छन्। कुल २१३ कम्पनीका शेयर मूल्य घट्दा ३९ कम्पनीमा मात्रै वृद्धि भएको छ।

लिबर्टी इनर्जीको मूल्य ७ प्रतिशतले घटेको छ भने बजार समग्रमा कमजोर हुँदा पनि हिम स्टार इनर्जीको शेयर १० प्रतिशतले उक्लिएको छ।

कारोबार रकम भने केही सुधार देखिएको छ। मंगलबार ४ अर्ब ४३ करोडको कारोबार भएको थियो भने आज ३२६ कम्पनीका करिब १ करोड १३ लाख कित्ता शेयर किनबेच भई ४ अर्ब ७२ करोडको कारोबार भएको छ।