वासिङ्टन डीसी । अमेरिकी राष्ट्रपति डोनाल्ड ट्रम्पले इरानसँग जारी द्वन्द्वका बिच नेटोका सदस्य राष्ट्रहरूले स्ट्रेट अफ हर्मुजको सुरक्षामा सहयोग नगरेको भन्दै कडा आलोचना गरेका छन् । नाटो देशहरूको यस्तो निर्णयलाई उनले मूर्खतापूर्ण गल्ती भनेका छन् ।

ह्वाइट हाउसमा आयरल्यान्डका प्रधानमन्त्री माइकल मार्टिनसँगको भेटका क्रममा ट्रम्पले अधिकांश नेटो सहयोगीहरूले इरानसँगको युद्धमा संलग्न हुन नचाहेको जानकारी आफूले पाएको बताए । धेरै युरोपेली देशहरूले उक्त द्वन्द्वलाई अवैध ठान्दै प्रत्यक्ष संलग्नता अस्वीकार गरेका छन् ।

स्ट्रेट अफ हर्मुजबाट ठुलो परिमाणमा विश्वको तेल आपूर्ति हुने गर्छ । हाल इरानमा जारी युद्धका कारण यो मार्ग प्रभावित भएको छ । यस्तो अवस्थामा केही देशहरू जहाजहरूको सुरक्षा गर्न तयार रहेको ट्रम्पले सङ्केत गरे पनि उनले ती देशहरूको नाम सार्वजनिक गरेका छैनन् ।

ओभल अफिसमा बोल्ने क्रममा ट्रम्पले ‘हामीलाई कुनै सहयोग चाहिँदैन’ भन्दै अमेरिका आत्मनिर्भर रहेको दाबी गरे । तर नेटो देशहरूले यस्तो संवेदनशील समयमा साथ दिनुपर्ने पनि उनले बताए । खाडी क्षेत्रमा माइन हटाउने जहाज नपठाउनु ठुलो कुरा नभए पनि अमेरिकाप्रति अन्यायपूर्ण भएको उनको भनाइ थियो ।

विशेष गरी बेलायतको आलोचना गर्दै ट्रम्पले अमेरिकी–इजरायली आक्रमणमा सहयोग नगरेको विषय उठाए । बेलायतसँगको सम्बन्ध पहिले निकै राम्रो रहेको तर वर्तमान प्रधानमन्त्री केयर स्टार्मर आएपछि कमजोर भएको सङ्केत पनि उनले गरे ।

इरानसँगको युद्धलाई ट्रम्पले अमेरिका र नाटोबिचको सम्बन्धको ठुलो परीक्षाको रूपमा चित्रण गरेका छन् । यद्यपि, यस विषयमा कुनै प्रतिशोधात्मक कदम चाल्ने योजना हाल नरहेको उनले स्पष्ट पारेका छन् ।